SAMAGAHA ATI

Asa aya samagaha na palebah kalakay ati

poek mongkleng teu nyesakeun kalangkang

ngagetruk lengkah nyiar jalan keur mulang

rek kamana kuring oge teu surti

Asa aya samagaha na pangacian diri 

rumeuk pasulibreng teu cekas katingali

ngahontal cekeleun keur tempat muntang ati

tapi teu wasa da salira teu katingal wira wiri

Iraha samagaha kaganti ku katumbiri

nu biasana endah ku pulas werna werni

hirup pasti leuwih kaharti

salira pasti langkung gumati.

@Bumi Asri==April 20, 2010 (21:35).-

SIMPE-NA PEUTING

Peuting jempling simpe

Ngan karacak sesa girimis

marengan hate nu lungse

Taya sora nu biasa ngagalindeng jentre

Ngeukeupan hate bari mepende

Peuting beuki henang hening

Ngan hiliwirna angin nu ngadalingding

Taya sora nu biasana ngaharewos

pinuh ku kawening

Ngahariring ngusapan hate kuring

Peuting ngangsrod ka  janari

Halimun turun rek mapag poe

Eusining carita nu kamari

Panuhun ulah disimpen na hate

@Bumi Asri==April 20, 2010 (20:50).-

TUNGGARA

Nangtung ngajanteng na sisi lamping lungkawing

Nungguan nu rek nyangking kuring

Pajar teh anjeunna nyaah taya papadana

Pajar teh anjeunna deudeuh taya bandingna

Nangtung na sisi cadas nu tohaga

Sigana anjeun ngulang sulaya

Kumaha kuring rek percaya

Taya basa taya carita komo deui tembongna

Cag carita nepi kadinya

Tungtungna ngan ukur tunggara

Kuring geus teu walakaya

Nyanggakeun takdir sadaya daya

@Bumi Asri ==April 13, 2010 (05.30)

PANTO HATE

Panto hate teh poe ieu rujad deui

padahal kai-na cikeneh diganti

ngabelaan pasini jangji

susuganan teu siga wanci kamari

Panto teh geus teu mangrupa

marukplukan ku rasa murka

poho yen ieu teh mamala

paralun teuing jadi aral subaha

Panto hate teh rek diganti sakabehna

dipageuhan sa-tulak2na

meh taya deui semah nu ngadon nyimpang

nu datangna peuting, balikna beurang

@Bumi Asri==April 13, 2010 (04.15).-

PANGLANGEUAN

Aya nu ngolebat na emutan
Siga kica kica na tegalan eurih

Najan sakedap nanging ninggal tapak

Nu dipikameumeut na hate nu peurih

Aya nu ngulampreng na lamunan

Siga haleuang pinuh ku kamelang

Najan saliwat tapi ninggal kahayang

Nu dipikadeudeuh na lawang panineungan

Aya nu ngaliwat na kahirupan diri

Siga angin nu datang nyiliwuri

Najan milipir tapi ninggal kanyeri

Nu dipikasono na sapotong ati

@Bumi Asri=April 12, 2010.- (17:55)

LIGAR KEMUNING

Kemuning teh ligar deui kembangna kang....

Seungitna ngahiliwir neumbrag 

kana hate nu pangjerona

Ngan ukur bisa neuteup bodasna

Ngan ukur bisa nyeuseup arumna

Kalangkang salira tetep ngan ukur kalangkang

jadi batur satia na handeuleum pangharepan

Kemuning teh leubeut deui kembangna kang...

Bodasna...

seungitna...

ngemutkeun kuring

kana katresna

kana kadeudeuh

kana kasono

salira ka kuring

@Bumi Asri==April 12, 2010 (14:00)

DATANGLAH ENGKAU

Kala...rinai hujan menyapa sosok bumi

sebentuk wajah bertabir lara

tersenyum di bawah atap daun nipah

Datanglah engkau...

datang dan datanglah

Tengadah wajah mereguk karunia Tuhan

sapaan sang hujan 

di tengah kala kerontang sang musim

adalah damba dan do'anya

di senyap belantara rimba

Datanglah engkau...

datang dan datanglah

dan sebaris do'a syukur lantas mengalun

membelah hari diantara gemericik air

Datanglah engkau...

datang dan datanglah

sebentuk wajah itu kini bertabur suka

hujanpun rinai

larapun usai

@Badak Field.-